الحرية و حدودها؟؟!!

[ashraf.idelbi]

الحرية

بعد كلشي شفنا بل افلام الأجنبية و رح بت بلش عنا كمان, هل شي بصح تفسيرو بكلمة الحرية بس الحرية ألهة حدود و مالازم نساوي كلشي بيخطر علبال...

1.حتة ببيتك في حدود يعني مو كل البناية بتحب تسمع الأغاني الي بتسمعة أنت

2.مافيك تشوي ع لبرندة و تشمم كل جيراناك ريحت المشاوي و تخنقهون بل دخان "ماتستغربو في عندي جار أنبرة لساني و أنا عم فهمو أنو هي برندة !!! مو جنينة" بس الله يثبت علينا العقل ودين !!!

3. كرة السلة ما بتنلعب من ع شباك أنشالله يكون بيتك أرضي والحاوية قدام شباكك حترم حالك " بتسألو ليش هيك بقلك أنا حر" .

4. يا معلم حتة لو أنت ملك جمال العالم مو منحقك تطلع بل ملابس الداخلية لبرة "كتير شايفينون بل شيال و الشورط عم يتمشو بلحارة"

5.ما تتكاسل تنزل/تطلع لعند رفيقك و تصرخ من تحت أو من علشباك

6.لو سمحت ماتعبر عن مشاعرك بل بخاخ على حيطان الحارة " لاحظتو مهيك؟"

7.يا حلوة حاجة طقسير تنورتك بكفي "لأ و فوق كل هاد ما بدهة حدة يلطشهة"

8.من بعد اذنك ممكن ما تعيط و أنت عم تحكي بلموبايل "والله بيسمعك من دون عياط "
9.عيني هاد مو شارع الي غلفوك لحتة طصف بمحل سيارتين و تلاتة "أنت حر بمزرعتك"

10.حاجة مسخرة على غلق الله بطالعة و بنازلة مالك حر بهشغلة...

شو أكتر حاجة لاحظتوهة من هل 10 و أذا في عندكون كمان فكملو أنتو أنا ماعت فيني لهون و السلام عليكم.

المواضيع المتشابهه:

• أسطول الحرية ...
• {منقولات} فلسفة الحرية ..مترجم
• الحرية نجاح الموقع
• لعشاق الحرية!!! ماهي الحرية الحقيقة؟؟؟؟
• قصة تمثال الحرية

[Abeer M]

حلو كتير الموضوع وهاد ما اسمو حرية هاد اسمو غلاظة وعدم احترااام للاخرين

يعني عيب والله اذا كل واحد بدو يكون حر هيك بتخرب البلد

وانت مشان جارك جيب وعلئ فحم شوي حد بلكون جاركون وطول هههههه حتى يحس هداك وخليه يكون قاعد عم يتعصرن على البلكون ... وقتا قلو انت انك حر بركي بيفهم هداك شو الحرية . بس مرة وحدة عملا معو ما على طول هههههه

والله كتير اشيا بتجيب العصبي هاد اللي بيخالف السير وبقلك معليش وبيرجعك الطريق كلو مشان حضرتو

وهاد اللي بيجيب كيس الزبالي وبحطو ئدام محلك طيب يحطو ئدام محلو يه بيقلك محلك على زاوية

والله اذا بدنا نضل هيك بحياتا مارح تعمر

مشكور على الموضوع

[Maxim]

تماما

" تنتهي حريتك عندما تبدأ حرية الأخرين "

[wedad abdelrazzak]

والله يا أشرف كلون
كلون بدايقو

يعني في كتير أمور الناس بيدرجوها تحت بند حرية شخصية .. ما بيعرفو انو في شي أسمو احترام الآخرين....احترام المجتمع ....الشارع.... الشغل.... المدرسة ....المكان يلي قاعد فيه .

بظن انو يلي ما بيكون محترم داخل بيتو مع أغراضو الخاصة ما بيقدر يبادر بنفس الشي اتجاه الغير

[serenity]

غريب سؤال الحريه .. او حتى فكره حدود الحريه ..

انو ليش حدود حريتي بيرسمها شخص أخر .. كيف بدو يكون اسمها حريه اذا في شخص عم يقيدها .. وحتى جملة "تنتهي حريتك عندما تبدأ حرية الأخرين" ..
يعني انا شغلتي أعرف "الأخرين" ايمتى بتبلش حريتهون ؟؟ واذا في مثلا "أخرين" تانيات مابلشت اتعدى على حريتهون شو بعمل بحالي؟؟!!

يعني انا حريتي مقيده بكل يلي حواليي وكل همي هو اني استخلص قدر أكبر من الحريه من "الأخرين"

برأي فكرة انو الحرية شي نسبي بحت حدودو أخلاق الشخص وبس ..

[Maxim]

انو ليش حدود حريتي بيرسمها شخص أخر .. كيف بدو يكون اسمها حريه اذا في شخص عم يقيدها .. وحتى جملة "تنتهي حريتك عندما تبدأ حرية الأخرين"

لما حريتك تجرح شخص معين !!!! بتعتبرها حرية ؟

[serenity]

الحرية تجرح شخص معين ... مممممم على حسب الشخص يلي عم اجرحو ..

فلو انا مواطن معتر .. ووقف على منبر.. وقلت يلي بقلبي وانجرحت مشاعر مسؤول حكومي .. فانو مافي مشكله انو يزعل مهيك؟؟؟

ولو انا كنت صاحب سلطه وضربت .. قتلت .. سرقت ...
فهون ماعد صار اسمها حرية .. وهيك شي طبيعي اي انسان يعرف .. انو هاد اغتصاب لحرية وممتلكات الأخرين.

بعتقد انو بهالمثالين وضحتلك كيف الحريه شي نسبي بين الانسان و "مجموعة الأخرين"

مع تحفظي لكلمه "تجرح" يلي استخدمتها ..

[Maxim]

مع تحفظي لكلمه "تجرح" يلي استخدمتها ..

بتعتبر اني تخطيت حدودي بكلمة " تجرح " ؟؟

[serenity]

بتعتبر اني تخطيت حدودي بكلمة " تجرح " ؟؟

على الأقل يا صديقي مابعتبرك تعديت على حريتي .. :)

[Maxim]

معناها الشغلة بتعود الك بس و شي حلو انك ما تحط حدود لحدا , و ما كنا منعرف هيك لو ما اختبرناك
بس ما منقدر مع كل العالم نعمل هيك لانه مو الكل عندو ه الصلاحية هي
لذلك منفضل نضل ضمن الحدود الا اذ الضو الاخضر شاعل :)

[serenity]

معناها الشغلة بتعود الك بس و شي حلو انك ما تحط حدود لحدا , و ما كنا منعرف هيك لو ما اختبرناك
بس ما منقدر مع كل العالم نعمل هيك لانه مو الكل عندو ه الصلاحية هي
لذلك منفضل نضل ضمن الحدود الا اذ الضو الاخضر شاعل :)

ممممم .. ممكن .. رأي صحيح يحتمل الخطأ ..

[ashraf.idelbi]

كلام maxim صح

[يمام ضاهر]

الحرية لازم تتقيد بحدود والا بتصير اغتصاب للحق
والحرية مطلوبة بس الحرية المطلقة مرفوضة
الحرية يلي حدودها الدين والمجتمع وتنتهي عندما تبدا حرية الاخرين

[ghazal92]

والله كلشي حكيتو يااشرف مظبوط بس هالعالم مابتحترم حالها ولا غيرها كلو بس الهم اسألك نفسي شو هل ناس